Update៖ អាមេរិក ថាចិនប្រើឧបករណ៍សម្ងាត់ នៅក្នុងបាល់ឡុង ដែលបានបាញ់ទម្លាក់ ខណៈចិន អះអាងថា គ្រាន់តែជាឧបករណ៍តាមដាន អាកាសធាតុប៉ុណ្ណោះ

វ៉ាស៊ីនតោន៖  ទូរទស្សន៍សិង្ហបុរី Channel News Asia បានផ្សព្វផ្សាយនៅថ្ងៃទី៧ ខែកុម្ភៈ ឆ្នាំ២០២៣ថា កាលពីថ្ងៃចន្ទលោក ចូ បៃដិន ប្រធានាធិបតីសហរដ្ឋអ...

វ៉ាស៊ីនតោន៖ ទូរទស្សន៍សិង្ហបុរី Channel News Asia បានផ្សព្វផ្សាយនៅថ្ងៃទី៧ ខែកុម្ភៈ ឆ្នាំ២០២៣ថា កាលពីថ្ងៃចន្ទលោក ចូ បៃដិន ប្រធានាធិបតីសហរដ្ឋអាមេរិក បានលើកឡើងដោយបាន ការពារការសម្រេចចិត្តថា រង់ចាំរហូតដល់បាល់ឡុងរបស់ចិន ឆ្លងកាត់សហរដ្ឋអាមេរិក នៅមុនពេលបាញ់ទម្លាក់ ហើយខាងសេតវិមានបានអះអាងថា ចារកម្មដ៏មានតម្លៃកំពុងត្រូវបាន ដកចេញពីឧបករណ៍នោះ ។

ប្រទេសចិនអះអាងថា តាមពិតបាល់ឡុងនេះគឺជា យន្តហោះសង្កេតអាកាសធាតុខុស ដោយគ្មានគោលបំណងយោធាឡើយ ប៉ុន្តែក្រុងវ៉ាស៊ីនតោន បានពណ៌នាថា វាជាយានស៊ើបការណ៍ រយៈកម្ពស់ដ៏ទំនើបទៅវិញ ។

យន្តហោះចម្បាំងរបស់សហរដ្ឋអាមេរិក ១គ្រឿង បានបាញ់ទម្លាក់បាល់ឡុងនេះកាលពីថ្ងៃសៅរ៍ នៅឯឆ្នេរសមុទ្រភាគខាងកើត នៃមហាសមុទ្រអាត្លង់ទិក ហើយកងកម្លាំងទ័ពជើងទឹក និងឆ្មាំឆ្នេរសមុទ្របច្ចុប្បន្នកំពុងស្រង់ យកកំទេចកំទីសម្រាប់ធ្វើការវិភាគ ពីយានស៊ើបការណ៍នេះ ។

លោក បៃដិន បានប្រាប់ដល់អ្នកយកព័ត៌មានថា “នៅគ្រាដែលវាមកដល់ សហរដ្ឋអាមេរិកពីប្រទេសកាណាដា ខ្ញុំបានប្រាប់ដល់ក្រសួងការពារជាតិថា ខ្ញុំចង់បាញ់វាឱ្យលឿន តាមដែលវាសមស្រប” ។

“ពួកគេបានសន្និដ្ឋានថា យើងមិនគួរបាញ់វាធ្លាក់ពីលើដីទេ។ វាមិនមែនជាការគំរាមកំហែងធ្ងន់ធ្ងរទេ ហើយយើងគួរតែរង់ចាំរហូតដល់វាឡើងលើទឹក” ។

អ្នកនាំពាក្យក្រុមប្រឹក្សាសន្តិសុខជាតិលោក John Kirby បានលើកឡើងថា បុគ្គលិកអាមេរិក “បានយកសំណល់មួយចំនួនចេញពីផ្ទៃសមុទ្រ” ទោះបីជាលក្ខខណ្ឌអាកាសធាតុ មិនអនុញ្ញាតឱ្យមានការឃ្លាំមើល នៅក្រោមសមុទ្រច្រើននៃវាលកំទេចកំទីក៏ដោយ ។

លោក Kirby បានឲ្យដឹងថា ពួកគេនឹង “នៅប៉ុន្មានថ្ងៃខាងមុខនេះ អាចចុះទៅទីនោះ ហើយមើលឱ្យកាន់តែច្បាស់ នូវអ្វីដែលនៅបាតសមុទ្រ ប៉ុន្តែវាទើបតែចាប់ផ្តើម” ៕